За листата на владејачката Српска напредна партија (СНС) на парламентарните избори гласале 1 783 701 граѓанин или 46,75 отсто, додека опозициската листа „Србија против насилството“ освоила 23,66 отсто од гласовите и за неа гласале 902 450 луѓе. Трета според бројот на освоени гласови е листата „Ивица Дачиќ – премиер на Србија“, за која се изјасниле 249 916 гласачи или 6,55 отсто
Републичката изборна комисија на Србија доцна синоќа ги објави конечните резултати од неодамнешните парламентарни избори во земјата откако вчера заврши повтореното гласање за пратеници во осум избирачки места.
Според Републичката изборна комисија (РИК), а врз основа на сите обработени избирачки места, листата „Александар Вучиќ – Србија не смее да запре“ освоила 46,75 отсто од гласовите и за неа гласале 1 783 701 граѓанин на земјата со право на глас, пренесуваат регионалниот сервис на Радио Слободна Европа и Н1.
Опозициската листа „Србија против насилството“, освоила 23,66 отсто од гласовите и за неа гласале 902 450 луѓе, пренесува Нова.рс, а за листата „Ивица Дачиќ – премиер на Србија“ се изјасниле 249 916 гласачи или 6,55 отсто.
Коалицијата НАДА (Нова ДСС и ПОКС) успеала да освои 5,02 отсто од гласовите, листата на Бранимир Несторовиќ „Ми – глас од народот“ освоила 4,69 отсто од гласовите, а коалицијата „Национален собир“ на партијата Заветници и движењето „Двери“ има 2,76 отсто од гласовите.
Сојузот на Унгарците од Војводина освоил 1,7 отсто од гласовите, Српската радикална партија 1,46 отсто, а листата предводена од Усаме Зукорлиќ и Томислав Жигманов 0,76 отсто.
Листата „СДА Санџак – Сулејман Угљанин“ добила 0,57 отсто, а листата „Политичката борба на Албанците продолжува – Шаип Камбери“ добила 0,35 отсто гласови.
Листата на Народната партија освоила 0,88 отсто, а Заедно за иднината 0,18 отсто, објави РИК.
Руската партија освоила 0,3 отсто од гласовите, листата на Чедомир Јовановиќ 0,24 отсто, а листата на Саша Радуловиќ и Борис Тадиќ 1,18 отсто од гласовите.
За листата „Србија на Запад“ се изјасниле 0,14 отсто, додека листата на „Албанска демократска алтернатива“ добила 0,08 отсто од гласовите.
Граѓаните на Србија во вторникот, на 2 јануари, гласаа на две избирачки места во Бачки Петровац, три во Бела Паланка и по едно во општините Беочин, Мионица и Петровац на Млава.
Изборите беа повторени на избирачките места каде што не беше можно да се утврдат резултатите од гласањето на изборите на 17 декември, како и каде што резултатите од гласањето беа поништени поради нерегуларности.
СНС: Листата „Александар Вучиќ – Србија не смее да запре“ победи со убедлива разлика
По повторените избори на осумте избирачки места со соопштение се огласи Српската напредна партија (СНС) од каде што велат дека нејзината изборна листа „Александар Вучиќ – Србија не смее да запре“ победила со убедлива разлика разлика на сите избирачки места.
„Во однос на резултатите од изборите одржани на 17 декември, СНС ја зголеми доминацијата на 70 отсто од освоените гласови“,
се наведува во соопштението.
Во него се додава дека СНС е благодарна за огромната поддршка и помош на претседателот на Србија, Александар Вучиќ и на „народот на Србија, кој е нашата сила“.
„Ќе продолжиме да се бориме уште посилно, за да го забрзаме економскиот напредок на Србија, да го зголемиме стандардот на граѓаните и да ја зачуваме автономијата и независноста на државата бидејќи Србија не смее да запре“,
соопшти СНС., пренесува Н1.
На 17 декември во Србија се одржаа парламентарни и локални избори во 65 општини и градови, меѓу кои и Белград.
Оттогаш дел од опозицијата предводена од коалицијата „Србија против насилството“ протестира во Белград тврдејќи дека изборите се нерегуларни, што владата на Српската напредна партија го негира.
Од коалицијата „Србија против насилството“ бараат одржување нови избори, според фер и демократски стандарди.
Извештаите на домашните и меѓународните мониторинг организации, вклучително и мисијата на Организацијата за безбедност и соработка во Европа (ОБСЕ), посочуваат дека имало изборни нерегуларности на изборите во Србија на 17 декември.
Канцеларијата за демократски институции и човекови права на ОБСЕ (ОДИХР) на 18 декември објави дека изборите ги одбележале нерегуларности, злоупотреба на јавните средства, медиумска доминација на претседателот на државата Александар Вучиќ, негативна кампања и ширење страв.
Набљудувачката мисија на ЦРТА соопшти дека на денот на изборите се случила организирана миграција која влијаела на исходот на изборите во Белград.
Дел од европратениците повикаа на независна истрага за сите пријавени нерегуларности за време на изборите. Европската унија и Соединетите Американски Држави ги повикаа властите во Србија да ги истражат наводите на меѓународните набљудувачи.
Владата предводена од Српската напредна странка демантира дека имало големи изборни нерегуларности, со оценка дека ова биле „најчистите избори досега“.
Извор: 360stepeni.mk
