Поранешниот државен правобранител од Охрид, Агрон Речи, реагираше на информациите објавени на повеќе новинарски портали, во кои се наведува дека против него е поднесена кривична пријава за „Лажно претставување“. Според обвинувањата, Речи наводно се претставувал како адвокат и застапувал странки пред суд, иако неговата адвокатска дејност била во мирување, со цел стекнување противправна имотна корист.
Речи категорично ги демантира овие наводи, истакнувајќи дека тие ја нарушиле неговата чест и интегритет, со оглед на тоа што биле распространети низ целата држава. Тој нагласи дека надлежното обвинителство ја отфрлило кривичната пријава поради недостиг на докази дека сторил кривично дело.
„Таквите информации значително го нарушија мојот углед. Надлежното обвинителство утврди дека нема основа за обвинение, што јасно докажува дека не сум сторил никакво кривично дело, ниту сум стекнал противправна имотна корист“, изјави Речи.
Тој, исто така, упати критики кон надлежните органи, особено кон Одделот за криминалистичка полиција при Бирото за јавна безбедност (БЈБ), кој, според него, треба посериозно да ги разгледува пријавите пред да ги процесуира. Според Речи, во овој случај општествениот статус на пријавителот имал поголемо значење од самите докази.
„Иронијата е уште поголема бидејќи пријавителот е судија во еден од апелационите судови и работи на предмети од кривичната материја“, додаде тој.
Речи истакна дека Адвокатската комора како независен орган досега немала никакви неправилности во своето работење и дека ваквиот случај создава лажна слика за адвокатите, особено оние кои работат во Охрид.
Тој тврди дека постапката против него била иницирана од лични мотиви, поврзани со обидот на посредниот пријавител неговата сопруга да ја задржи на позицијата Овластен потписник на Државниот правобранител, иако против неа бил поднесен предлог за разрешување поради нестручно и несовесно работење.
На крајот, Речи најави дека ќе поднесе кривична пријава против пријавителот за „Лажно пријавување на кривично дело“, како и тужба за клевета и навреда против сите инволвирани, доколку не добие јавно извинување од нив.
ИЗВОР: ТВ 21
