ИСТАНБУЛ (АА) – Агенцијата на ОН за палестински бегалци (УНРВА) денес соопшти дека Газа се соочува со најинтензивно бомбардирање на цивили од Втората светска војна, јавува Анадолу.
По повод одбележувањето на Меѓународниот ден на солидарноста со палестинскиот народ, УНРВА ја истакна „тешката ситуација на палестинските бегалци“, нагласувајќи дека тоа е „најдолга нерешена бегалска криза во светот“.
„Во текот на изминатата година Газа доживеа најинтензивно бомбардирање на цивилното население од Втората светска војна“, се вели во извештајот.
Генералното собрание на ОН во 1977 година донесе одлука според која 29 ноември се одбележува како Меѓународен ден на солидарноста со палестинскиот народ. Одлуката беше донесена во знак на сеќавање на Резолуцијата 181 од 1947 година, со која се предлагаше создавање на две посебни држави, посебна арапска и посебна еврејска држава на просторот на Палестина по завршувањето на британскиот мандат.
Израел започна геноцидна војна во Појасот Газа по прекуграничниот напад на палестинската група Хамас во октомври минатата година. Во израелските напади убиени се над 44.300 Палестинци, повеќето жени и деца, а повредени се речиси 104.900.
Минатата недела Меѓународниот кривичен суд (МКС) издаде налози за апсење на израелскиот премиер Бенјамин Нетанјаху и поранешниот министер за одбрана Јоав Галант за воени злосторства и злосторства против човештвото во Газа.
Израел, исто така, се соочува со случај за геноцид пред Меѓународниот суд на правдата за неговата смртоносна војна против Газа.
Извор: Anadolu Agency (AA)
