Игор Здравковски, пратеник од редовите на ВМРО-ДПМНЕ, во гостувањето на емисијата „24 Анализа“ на телевизија 24 се осврна на процесот на интеграција на Македонија во ЕУ и истакна дека се соочуваме со значајни предизвици, но и дека Владата предводена од ВМРО-ДПМНЕ работи на тоа да го унапреди патот на Македонија кон ЕУ.
„Тоа е процес којшто трае, за жал, 20 години, меѓутоа се некако тапкаме во место. Да бидам искрен, Република Македонија направи толку многу отстапки што мислам дека ниту една држава нема такви отстапки направено. Меѓутоа, од друга страна пак, за жал, морам да потенцирам дека во делот кој што ни е домашна задача, па и таму ништо не направивме. А, тоа сето може да се види од сите извештаи на Европската Комисија од годините наназад како ние се приближуваме или заостануваме во овој наш пат кон ЕУ, кој што, реално, е наша стратешка определба и на сите претходни влади. Меѓутоа, за жал, до сега ништо не се направило“, истакна Здравковски.
Здравковски нагласи дека е позитивно што владејачката ВМРО-ДПМНЕ има реформска агенда, која е прифатлива за земјата и која значи почеток на процеси за административно приближување кон европските стандарди.
„Она што е добро, е што имаме една реформска агенда која што е прифатлива за Република Македонија и којашто значи отпочнување на некакви процеси во административно приближување до она што значи европски стандард. И тие процеси во реформската агенда се определени со точни датуми и точни чекори што треба да се направат за да добиеме некакви средства на кои што сите се надеваме и претходно сме ги очекувале, меѓутоа, за жал без никаква работа од наша страна тие пари никогаш нема да ги добиеме и да ги определиме“, изјави Здравковски.
Здравковски нагласи дека Владата предводена од ВМРО-ДПМНЕ е обврзана да ги реализира сите домашни задачи кои ќе дозволат исполнување на критериумите за членство во ЕУ, но исто така предупреди дека не може да се прават понатамошни отстапки.
„Тука, пред се, мислам на уставни измени и сето она што значеше прецизирање на некакви точки во оној договор за добрососедство, кој што за жал видовме дека не се применува, ниту пак има намера да се примени од другата страна. И, токму затоа, ние се обидуваме да ги почитуваме оние барања во делот на административните побарувања од ЕУ, но истовремено сакаме и да потенцираме дека не можеме и понатаму да правиме отстапки. Треба да седнеме и да се договориме да го исцртаме патот по кој што ќе одиме“, додаде Здравковски.
Здравковски додаде дека Македонија има потенцијал да постигне напредок во процесот на ЕУ интеграција, ако се продолжи со сериозен и конструктивен дијалог со ЕУ.
„Оптимизмот на Муцунски, сметам дека се темели поради тоа што од другата страна, оној наш стратешки партнер ЕУ гледа дека навистина има сериозен партнер во Република Македонија“, заклучи Здравковски.
ИЗВОР: kurir.mk
