БРИСЕЛ (АА) – Комесарката за проширување на Европската Унија (ЕУ), Марта Кос, денеска рече дека ЕУ се обидува да постигне динамика во проширувањето, со отворање на поглавјата со Украина и Молдавија оваа година, а во исто време има за цел да ги поддржи Црна Гора и Албанија во завршувањето на процесот на пристапување во наредните години, јавува Анадолу.
Кос денеска присуствуваше на состанокот на Комисијата за надворешни работи на Европскиот парламент за првпат откако го презеде својот петгодишен мандат во Европската комисија на 1 декември минатата година.
„За прв пат во десет години, имаме реални очекувања дека можеме да донесеме две или три земји кандидатки преку линијата“, рече Кос, додавајќи дека сегашната динамика се должи на прозорецот на можности што го отвори војната во Украина.
Кос нагласи дека оваа циклична можност не значи дека ќе има „попусти“ во процесот на проширување на ЕУ.
„Процесот на проширување ќе продолжи да се заснова на заслуги“, порача комесарката Кос.
Таа изрази очекување дека за време на актуелното полско претседателство ќе бидат отворени едно или две поглавја со Украина и Молдавија.
Додаде дека Црна Гора има визија да го заврши преговарачкиот процес до крајот на 2026 година, а Албанија до крајот на 2027 година и дека во тие напори ќе ја имаат поддршката од Брисел.
„Украина прави големи работи. Кога разговарав со украинскиот претседател Владимир Зеленски, тој ме замоли да ги отвориме сите поглавја оваа година“, рече Кос.
Нагласувајќи дека реформите што Украина ги спроведува мора да бидат одржливи, Кос рече дека ниту на Киев нема да му изостане поддршката од Брисел.
„Од друга страна, ситуацијата во Грузија е впечатлив потсетник дека патот кон членството во ЕУ не е лесен и дека може да дојде до назадување. Длабоко жалам што властите продолжуваат да се дистанцираат од ЕУ интеграциите“, рече Кос, потсетувајќи на протестите што започна во Грузија откако владата ги прекина преговорите со ЕУ.
Таа понатаму изјави дека Европската Унија го цени она што Туркије го направила на полето на помошта за бегалците и додаде дека планираат во март и април да воспостават дијалог на високо ниво со Туркије за економијата.
Извор: Anadolu Agency (AA)
