За да се забрза изградбата на автопатиштата под надлежност на „Бехтел и Енка“, Владата најавува промени во Законот за странци. Новите измени, објавени на платформата ЕНЕР, имаат за цел да ги олеснат процедурите за ангажирање странски работници, објави Фактор.
Олабавување на критериумите: Се намалуваат обврските кои странските работници треба да ги исполнат за привремен престој, како што е доказ за средства за сместување.
Едноставна документација: Процесот ќе се забрза со исклучување на обврската за мислење од Агенцијата за вработување.
Подолг рок за продолжување на престој: Наместо 30 дена, барањето за продолжување ќе може да се поднесе 90 дена пред истекот на дозволата.
Специјални одредби за стратешки проекти: Работници на проекти од јавен интерес ќе добиваат привремен престој независно од квотите на пазарот на труд.
Министерството за внатрешни работи смета дека измените се во согласност со Законот за утврдување јавен интерес и ќе ја поедностават процедурата за сите компании кои вработуваат странци. Според министерот, новите решенија ќе овозможат ефикасно спроведување на инфраструктурните проекти.
Според предлагачите, измените нема да предизвикаат нови фискални обврски, ниту дополнителни ресурси за институциите. Исто така, нема да има влијание врз малите и средни претпријатија.
Иако се предвидуваат олеснувања, документот укажува на ризици во однос на спроведувањето од страна на институциите.
ИЗВОР: racin.mk
