Зошто Шуто Оризари е преполно со отпад? – Преписка меѓу Град Скопје и градоначалникот Дудуш

Населбата Шуто Оризари е полна со отпад.

Инспекциските служби на Град Скопје велат дека откриле оти градоначалникот на Шуто Оризари Курто Дудуш создал дива депонија. Според Град Скопје, наместо отпадот што го акумулира да го фрли на депонијата „Дрисла“, Дудуш на своето приватно земјиште направил депонија и ги принудувал граѓаните да плаќаат.

„Имено, Дудуш има поставено свои приватни контејнери на општинските улици, а на граѓаните им наплатува за чистење на отпадот по прием, за што има соодветни докази. Потоа, иако знаел дека е незаконски, отпадот го складирал на свој имот, односно приватна парцела во негова лична сопственост со која имал склучено договор и го дал под закуп на општината. Отпадот што незаконски го собирал и го наплатувал, а потоа наместо да го одлага во единствената акредитирана депонија „Дрисла“, со неа направил приватна депонија“, велат од Град Скопје.

Од Град Скопје велат дека актите се утврдени, направен е записник и е поднесена пријава. Но, градоначалникот на Шуто Оризари вели дека бил принуден да создаде депонија бидејќи Комунална Хигиена редовно не го собира отпадот.

За приватната депонија што ја создал, Дудуш вели дека општината ќе ја чисти, а за ова на 13 јануари ќе биде распишан тендер. Објаснување побаравме и од ЈП Комунална Хигиена, дали редовно одат во оваа населба за собирање на отпадот, но одговор сè уште не добивме. Инаку, Град Скопје синоќа започна вонредна акција за чистење и дезинфекција во општина Шуто Оризари за, како што соопштија, да се спречи ширење на инфекции и загрозување на животната средина на жителите.