Со помош на Google Earth Engine, а врз основа на Hansen Global Forest Change v1.11 (2000-2023) базата на податоци, изработена е карта на загубата на шумски површини и на „нови“ шумски површини во Македонија, за периодот 2000-2023 година, објави денеска граѓанската иницијатива Охрид СОС, повикувајќи се на визуелизацијата на ИГЕО.
Од мапата приложена со објавата, видливо е дека значително доминираат површини со загуба на шуми во однос на новите.
Ако на ова се додаде и состојбата со пожарите во 2024 година, која не е опфатена со оваа статистичка визуелизација, ситуацијата е навистина загрижувачка. Последиците пак, стануваат сè пожестоки, особено во поглед на еколошките ефекти, биодиверзитетот и сè поголемите природни непогоди (како што се поплави, свлечишта, ерозија).
Овој тренд уште повеќе ќе се засилува како последица на антропогено предизвиканите климатски промени, предупредуваат од Охрид СОС.
Во Охридскиот Регион, губењето на шумите особено е забележително на планината Јабланица. Министерство за животна средина безмалку две децении го одолговлекува процесот и наместо да ја прогласи Јабланица за национален парк, им остава мегдан на дрвокрадците и другите уништувачи на планината, укажуваат од граѓанската иницијатива Охрид СОС.
ИЗВОР: racin.mk
