ТЕЛ АВИВ (АА) – Израелскиот министер за надворешни работи Израел Кац денес повика на „палестинска самоуправа“ на окупираниот Западен Брег со безбедност и надворешни работи под израелска контрола, јавува Анадолу.
Повикот следува еден ден откако палестинската група на отпорот Хамас го именува Јахја Синвар за политички шеф на местото на Исмаил Ханије, кој минатата недела беше убиен во иранскиот главен град Техеран.
Хамас и Иран го обвинија Израел за извршување на убиството на Ханије, но Тел Авив ниту ја потврди ниту ја негираше одговорноста.
„Изборот на Јахја Синвар за лидер на Хамас мора да прати јасна порака до светот дека палестинското прашање сега целосно е под контрола на Иран и Хамас“, рече Кац во објавата на социјалната мрежа Х.
Тој изјави дека израелските воени операции на окупираниот Западен Брег имаат цел да спречат територијата да падне под контрола на Хамас.
„Решение е палестинскo самоуправување во Јудеја и Самарија (Западниот Брег, заб.ав.), дозволувајќи им да управуваат со сопствените животи. Израел мора да ја задржи контролата над безбедноста и надворешните работи за да спречи формирање на уште едно иранско-исламистичко упориште на екстремисти и да им дозволи на Палестинците да управуваат со своите внатрешни работи“, истакна Кац.
За изјавите на Кац досега нема коментар од палестинска страна.
Палестинците сакаат да основаат независна држава на окупираниот Западен Брег и Појасот Газа, а Израел се противи на тоа.
Минатиот месец Кнесетот (израелскиот Парламент) гласаше за одбивање на формирање палестинска држава, нарекувајќи го егзистенцијална закана за Израел.
Меѓународниот суд на правдата на 19 јули ја прогласи повеќедецениската окупација на Палестина од страна на Израел за нелегална и побара евакуација на сите постојни нелегални населби на Западниот Брег и Источен Ал Кудс (Ерусалим).
Извор: Anadolu Agency (AA)
