ГАЗА (АА) – Израел ослободи шестмина Палестинци, вклучително и две жени, кои ги приведе за време на копнените напади врз Појасот Газа што траат од 7 октомври минатата година, јавува Анадолу.
Очевидци изјавија дека израелските војници ги ослободиле Палестинците во воената зона Кисуфим во Деир ал Белах.
Очевидци изјавија дека ослободените „едвај оделе поради голем замор, исцрпеност и болки предизвикани од тортура, несоница и неисхранетост“, како и дека имале рани по телото.
Шесттемина Палестинци, од кои две жени, кои Израел ги ослободи, за АА изјавија дека „биле подложени на тепање, тортура, навреди и постојано испрашување“.
Израелската армија приведе илјадници Палестинци, вклучително жени, деца, здравствени работници и работници од цивилната одбрана откако почна со копнени напади врз Појасот Газа.
Мал број се ослободени, а за поголем дел не се знае судбината.
Во заедничкиот извештај објавен од страна на Здружението на палестинските затвореници и Делегацијата на затвореници и ослободени лица на Палестинската ослободителна организација по повод „26 јуни – Меѓународен ден на солидарност со жртвите на тортура“ се наведува дека најмалку 18 Палестинци загинале во израелските затвори од 7 октомври.
Во претходното соопштение на Хамас се вели дека палестинските затвореници во израелските затвори „се подложени на најбрутални и ужасни форми на одмазда, меѓу кои и гладување, понижување, малтретирање, медицинско запоставување, убиство и егзекуција“.
Извор: Anadolu Agency (AA)
