АНКАРА (АА) – Израелските медиуми денес цитираа израелски воени извори дека армијата е подготвена да го нападне Рафа во јужниот дел на Појасот Газа за 72 часа доколку не се постигне договор за прекин на огнот, јавува Анадолу.
Египет е домаќин на опсежни преговори со делегации од Израел и Хамас, со цел да се постигне прекин на огнот во Газа.
Израелската новинска веб-страница Јнет објави дека началникот на Генералштабот на израелската армија, Херзи Халеви, ги одобрил конечните планови за воена офанзива во Рафа, заедно со планот за движење на цивилите кон областите во централниот дел на Појасот Газа.
Веб-страницата за вести цитираше неименуван извор што рече дека тенковите и војниците на израелската армија се наредени во близина на границата со Газа и подготвени се за зелено светло за започнување на офанзивата.
Се додава дека наредните 48 до 72 часа се критични во однос на постигнувањето договор со групата Хамас или започнување на нападот врз Рафа.
Израелските медиуми во понеделникот објавија дека израелска делегација треба да отпатува во Египет за да се состане со египетските безбедносни претставници за напорите за прекин на огнот во Газа.
Египет, исто така, потврди дека има нов предлог за примирје во блокираниот Појас Газа.
„Постои предлог на маса да се постигне примирје во Газа“, рече египетскиот министер за надворешни работи Самех Шукри за време на состанокот на Светскиот економски форум во Саудиска Арабија.
Рафа е последна област во енклавата каде што Израел сè уште официјално не објавил влегување на своите војници за да го продолжат нападот против Палестинците.
Се проценува дека Хамас држи повеќе од 130 израелски заложници, а Тел Авив има над 9.100 Палестинци во своите затвори.
Хамас бара прекин на смртоносната офанзива на Израел во Појасот Газа и повлекување на израелските сили од територијата за каков било договор за размена на заложници и затвореници со Тел Авив.
Претходниот договор во ноември 2023 година беше со ослободување на 81 Израелец и 24 странци во замена за 240 Палестинци, вклучително 71 жена и 169 деца.
Израел спроведе брутална офанзива во Газа по прекуграничниот напад на палестинската група Хамас на 7 октомври минатата година, а Тел Авив вели дека во него се убиени речиси 1.200 луѓе.
Оттогаш се убиени речиси 34.500 Палестинци, главно жени и деца, а над 77.600 се повредени во услови на масовно уништување и сериозен недостиг на неопходни работи.
Според податоците на Обединетите нации, израелските напади врз палестинската енклава принудија 85 отсто од населението на Појасот Газа внатрешно да се раселат, предизвика акутен недостиг на храна, чиста вода и лекови, а 60 отсто од инфраструктурата на енклавата се оштетени или уништени.
Израел е обвинет за геноцид пред Меѓународниот суд на правдата. Привремената пресуда во јануари му нареди на Тел Авив да ги запре геноцидните акти и да преземе мерки за да обезбеди хуманитарна помош за цивилите во Газа.
Извор: Anadolu Agency (AA)
