Загарантираните цени на пазарите ќе траат до четврток. Мерката на Владата истекува на последниот ден од месецов, односно на 29 февруари. За потоа Министерството за економија соопшти дека нема да продолжи. Надлежните велат дека ќе чекаат да се изгласа Законот за спречување на нефер трговски практики кој е во собраниска процедура откако беше одобрен од Владата во декември минатата година. Засега не се знае дали новиот закон ќе ги помине сите собраниски филтри до крајот на неделата, бидејќи утре на пленарна седница ќе се гласа само за првото читање. Потоа законот повторно оди во матичната комисија за дополнителни измени. Од Министерството за економија велат дека со одобрување на законот ќе се воспостави ред и ќе се намалат цените.
„Очекуваме ова законско решение кое е целосно усогласено со европската регулатива и е под европско знаме, да биде одобрено што е можно поскоро“, наведуваат од Министерството за економија.
Законот предвидува ограничување на маржите од 10%, казни од 1.000 до 20.000 евра и период на имплементација од шест месеци. Останува да видиме дали в петок на 1 март ќе има нов ценовен шок за граѓаните во продавниците и пазарите. Од невладината “FinanceThink” велат дека се наоѓаме пред опасност од нов ценовен шок бидејќи неколкумесечното замрзнување на цените не е во согласност со слободната пазарна економија.
Мерката „загарантирани цени“ која Владата ја воведе во втората половина на септември минатата година како замена за замрзнувањето на цените, опфати дваесет категории производи. Тоа беа оризот, пченичното брашно тип 400 и 500, белиот и полубелиот леб, колачиња, тестенини, говедско, свинско и пилешко место, млеко и млечни производи и друго. Подоцна беа воведени т.н. загарантирани цени и за пивото, газираните и негазираните пијалоци и водата. Утре пак, истекува и владината мерка со која се ограничува царината од 10 отсто за увоз на овошје и зеленчук што може дополнително да ги зголеми цените на пазарите.
Аднан Ќаили
Извор: alsat.mk
