Претходно, ЕУ се огласи преку заедничка изјава на шефот на дипломатијата и потпретседател на ЕУ, Жозеп Борел, и на комесарот за проширување и добрососедство Оливер Вархеји, во која со загриженост заклучуваат дека изборниот процес во Србија бара опипливи подобрувања и дополнителни реформи, бидејќи правилното функционирање на демократските институции се во сржта на пристапувањето на Србија во Европската Унија
Европската Унија повикува на мир и дијалог, соопшти Европската комисија на барање на Н1 телевизија да ги коментира низата настани во Србија што се случија по вонредните парламентарни и локални избори одржани на 17 ноември.
„Иако правото на мирни демонстрации мора да се зачува, насилството не е решение и е неприфатливо. Полициските дејствија мора да бидат пропорционални и да ги почитуваат основните права во рамки на владеењето на правото“,
изјавиле од Европската комисија на прашањето на Н1 како ги коментираат изборните нерегуларности во Србија, нападите врз меѓународните набљудувачи на изборите, протестот против изборната кражба, насилството на протестот, полициската бруталност, штрајкот со глад на Мариника Тепиќ и соработката на Србија со руските безбедносни служби.
Како што додаваат од ЕК, „приговорите за изборни нерегуларности треба соодветно да се истражат и да се постапи по нив“.
Претходно, ЕУ се огласи преку заедничка изјава на шефот на дипломатијата и потпретседател на ЕУ, Жозеп Борел, и на комесарот за проширување и добрососедство Оливер Вархеји, во која со загриженост заклучуваат дека изборниот процес во Србија бара опипливи подобрувања и дополнителни реформи, бидејќи правилното функционирање на демократските институции се во сржта на пристапувањето на Србија во Европската Унија.
Како што изјавија тогаш, Европската комисија го очекува конечниот извештај на ОДХИР и препораките за идните избори, предупредувајќи дека тие треба да се спроведат што е можно побрзо и пред следните избори.
Синоќа во Србија се одржа деветтиот протест на опозицијата против изборните нерегуларности. „Ослободете ги сите“ – беше главната порака која стотици граѓани, на покана на опозициската коалиција „Србија против насилството“, ја испратија од пред зградата на Градското собрание во Белград, барајќи ослободување од уапсените демонстранти по инцидентите на протестите во неделата.
За инцидентите на протестот од викендот, „Србија против насилството“ ја обвини власта велејќи дека испратила свои хулигани, а оти ги искористила немирите за да се справи со мирните демонстранти кои на протестот барале повторување на изборите одржани на 17 декември.
Секојдневните протести на српската опозиција започнаа откако матичната партија на претседателот Александар Вучиќ, СНС, прогласи целосна победа на изборите, за кои опозицијата тврди оти се украдени од власта.
Извор: 360stepeni.mk
