ТУЛКАРЕМ (АА) – Шест Палестинци, меѓу кои тројца тинејџери, се убиени утрово, а неколкумина се повредени во напад на израелски дрон во бегалскиот камп Нур Шамс во градот Тулкарем, во северниот дел на окупираниот Западен Брег, јавува Анадолу.
Палестинското Министерство за здравство објави дека „телата на шест (Палестинци) пристигнале во владината болница Табет Табет во градот Тулкарем“.
Загинатите се идентификувани како Ахмед Анвар Хамаршех (19), Ахмед Абдел-Рахман Иса (19), Адхам Мухамад Фахмави (23), Јазан Ахмед Фахмави (23), Фарес Хусам Фахмави (29) и Хамза Ахмед Фахмави (17), соопшти Министерството.
Израелската војска изврши рација во бегалскиот камп Нур Шамс рано утрово и распореди снајперисти на покривите на зградите, предизвикувајќи судири со жителите на кампот, изјавија очевидци за Анадолу.
Тие додадоа и дека израелски дрон истрелал проектил што погодил одредена локација во кампот.
Израелската војска повеќе од еден час ги спречуваше медицинските тимови да влезат во кампот, а потоа им дозволи влез за да ги пренесат загинатите и повредените лица, се вели во соопштението на палестинската Црвена полумесечина.
Израелската војска, нема издадено никакво соопштение за нападот со дрон и смртта на Палестинците.
Тензиите се високи низ Западниот Брег откако на 7 октомври избија борби меѓу палестинските групи на отпорот и Израел во Газа.
Според палестинското Министерство за здравство, 311 Палестинци се убиени од страна на израелските сили на Западниот Брег од 7 октомври, а над 3.300 се повредени.
Извор: www.aa.com.tr
