ВАШИНГТОН (АА) – Соединетите Американски Држави (САД) најавија продолжување на привремената заштита од депортација за Украинците кои моментално живеат во таа држава, дозволувајќи им да останат уште 18 месеци, јавува Анадолу.
Министерството за домашна безбедност соопшти дека продолжувањето опфаќа околу 26.000 моментални корисници на привремен заштитен статус и ќе им овозможи на дополнителни 166.700 Украинци во САД да аплицираат за привремен заштитен статус.
Администрацијата на Џо Бајден првпат го продолжи привремениот заштитен статус на Украинците во март 2022 година, набрзо по почетокот на руската војна во Украина.
„Актуелната воена инвазија на Русија врз Украина и хуманитарната криза што произлезе од тоа наложуваат САД да продолжат да осигуруваат безбедност и заштита на Украинците кои можеби нема да можат да се вратат во својата татковина“, рече секретарот за внатрешна безбедност Алехандро Мајоркас.
