АНКАРА (АА) – Ирак денес се закани дека ќе ги прекине своите дипломатски односи со Шведска доколку во иднина повторно се случи сквернавење на светата книга на муслиманите, Куранот, јавува Анадолу.
„Ирачката Влада ја информираше шведската Влада преку дипломатски канали дека секое повторување на инцидентот со палење на светиот Куран на шведска територија ќе налага прекинување на дипломатските односи“, објави Кабинетот на премиерот Мохамед Шија Ал Судани на Твитер.
Соопштението е објавено откако демонстрантите во Ирак упаднаа во шведската Амбасада во Багдад и подметнаа пожар утринава како одговор на палењето на копија од Куранот во Шведска.
Акцијата на демонстрантите следбеници на шиитскиот свештеник Муктада ал-Садр се случи откако Салван Момика запали примерок од муслиманската света книга под полициска заштита пред стокхолмската џамија во Шведска минатиот месец, што беше широко осудено во муслиманските земји.
Шведското Министерство за надворешни работи го осуди нападот врз нејзината Амбасада во Багдад, нарекувајќи го „сериозно кршење“ на Виенската конвенција.
Извор: www.aa.com.tr
