Во грчката област Атика беснеат пожари што на жителите им ги враќаат сеќавањата од огнената катастрофа што им се случи пред точно пет години во јули 2018 кога загинаа 104 лица, а над 700 беа евакуирани.
Денеска горат два пожари на две различни локации – едниот во источниот дел на областа Атика, поширокиот регион на Атина, другиот на Пелопонез во близина на Коринт и засега се вон контрола.
Заради заштита на населението веќе почна евакуација на жителите од населените места во погодените региони, додека во близина на Атина веќе има и материјална штета, јави МИА.
Грчките медиуми објавуваат драматични видеа од терен.
Пожарот во источниот дел на областа Атика е активен над пет часа и поради силниот ветер се шири со голема брзина, а веќе изгореа домови во неколку населби кои не се густо населени.
Поради пожарот на Пелопонез, затворен е автопатот од Атина до Коринт и во двата правци, а превентивно беа евакуирани детски камп и дом за нега на стари лица.
Властите издадоа неколку превентивни известувања за евакуација на населените места во близина на пожарите вклучувајќи ги Анависос, Лагониси, Пета Кувара и Саронида. Евакуирани се и еден манастир и населбата Хелони. Пожарот им се заканува и на електричните столбови, па можни се прекини на снабдувањето со струја.
Пожарникарите од копно и од воздух се обидуваат да ги стават под контрола огнените јазици. Според грчката новинска агенција АНА-МПА, за пожарите ќе се одржи вонреден состанок на надлежните министри.
Грчките медиуми јавуваат дека пожарите избувнале при многу топли, суви и ветровити метеоролошки услови. Според надлежните, повеќе од 150 лица се на терен, но состојбата не се смирува и можно е проширување на огнот.
За време на европскиот топлотен бран во јули 2018 година Грција беше зафатена од серија шумски пожари кои започнаа во крајбрежните области на Атика. Тогаш загинаа 104 лица. Тоа беа втори најсмртоносни пожари во 21 век, по пожарите во Австралија во 2009 година во кои загинаа 173 лица.
Насловна фотографија: принтскрин
Извор: 360stepeni.mk
