Книгата за деца и млади „Фудбалски сон“ од познатата холандска авторка Линеке Дајкзул е објавена на македонски јазик во издание на „Бата прес“. Романот од холандски на македонски јазик го преведе Ели Пујовска. Објавувањето на ова дело, поддржано и од Холандската фондација за литература, е во рамките на проектот „За нивната иднина“ со кој „Бата прес“ во текот на оваа и во наредната година со поддршка од Европската Унија, од програмата „Креативна Европа“, ќе објави 15 книги за деца и млади од 15 познати европски автори.
– Ова е книга за фудбалот во која при читањето ќе уживаат дури и оние што не сакаат спорт. Се чини невозможно, но така е, велат од „Бата прес“.
Момчињата Рахман, Тигани и Хенри имаат талент, што значи имаат некаква шанса да избегаат од големата сиромаштија во нивното село во Африка. Нивниот тренер има контакти во фудбалски клуб во градот и ќе ангажира скаут да дојде и да види колку вешто тие можат рачно изработената топка да ја шутираат и водат по прашината.
Само Рахман ќе ја има потребната сила на карактерот за да се пробие. По трансферот во Холандија, кога Рахман ќе се врати во селото, носејќи кул патики и нови алишта, ќе сфати дека никој повеќе не го гледа како Рахман, туку се фокусираат на неговите пари и неговиот успех. Ама и тој е сменет.
Токму оваа драма го прави романот „Фудбалски сон“ толку силен. Дајкзул не пишува за фудбалот бидејќи е убава игра за момчиња, туку затоа што има важна порака. Оваа волшебна приказна зборува за големата жртва што понекогаш ја бара амбицијата.
Холандската писателка Линеке Дајкзул е родена во 1950 година. Таа е авторка што е најпозната по своите детски и тинејџерски книги. Нејзините романи „Втората виолина“ (1991), „Глувче со канџи“ (1993) и „Краток спој“ (1996) беа во најтесен избор на жирито за Холандската награда за детска литература. Во 2006 година ја објави својата прва книга за возрасни, психолошкиот трилер „Тивок грев“. Во 2007 година, го објави продолжението „Студена пролет“, втората книга со Пол Вегтер како главен лик. После големиот успех со овој серијал, ги напиша и продолженијата „Мирисот на дождот“ (2009), „Изгубениот син“ (2011) и „Она што останува“ (2012).
Republika.mk – содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
ИЗВОР: republika.mk
