Хакан Фидан беше шеф на Националната разузнавачка организација (МИТ) на Турција уште од 2010 година. Претходно, бил советник на Ердоган во неговиот премиерски кабинет
Старо-новиот претседател на Турција, Реџеп Таип Ердоган, вчера положи заклетва на стартот на својот трет мандат како претседател на Турција. Светските медиуми сега ги анализираат луѓето кои Ердоган ги одбра за да ги водат владините ресори.
„Преживеаа“ само двајца од стариот кабинет
Од вкупно 18 члена на кабинетот на Ердоган, бројка што го вклучува и заменик-претседателот, дури 16 имиња се нови за позициите. Тоа значи дека само две имиња од претходниот кабинет на Ердоган ја добиле довербата да продолжат да си ја вршат функцијата.
Тие двајца се министерот за култура, Мехмет Нури Ерсој и министерот за здравство, Фахретин Коча.
Разузнувач на местото на Чавишоглу
Хакан Фидан е името и презимето на новиот министер за надворешни работи на Турција. Тој доаѓа на местото на Мевлут Чавишоглу. Фидан зад себе има воена и разузнавачка кариера. Од 2010 година тој е шеф на турската Национална разузнавачка агенција (МИТ).
Агенцијата, по струкутура, му одговара на претседателот на државата и има широко поле на дејствување, односно „собирање информации од национален интерес“ и во земјата и во странство. Во времето на Хакан Фидан како нејзин шеф, се знае дека МИТ во одреден момент прислушувала околу 2 500 луѓе надвор од земјата, дека учествувала во бројни операции против организијата која Турција ја смета за терористичка – ФЕТО, дека посредувала во размена на затвореници меѓу САД и Русија и друго.
Според британски Гардијан, одлуката разузнавачот Хакан Фидан да биде именуван за министер за надворешни работи на местото на дипломатот од кариера Мевлут Чавишоглу, може да значи промена во стилот и начиниот на водење на надворешната политика на Турција.
Меѓу последните активности на Фидан како разузнавач е неодамнешна средба во Москва со неговите руски, ирански и сиријски колеги, во врска со војната во Сирија.
„Тој е чуварот на моите тајни, тој е чуварот на државните тајни“,
Почитуван банкар за министер за финансии
Новиот министер за финансии на Турција е Мехмет Шимшек. Станува збор за поранешен банкар со високо меѓународно реноме. Шимшек бил особено почитуван од инвеститорите, пишува Ал Џезеира, кога ја извршувал функцијата министер за финансии од 2009 до 2015 година и потоа како вицепремиер за економија до 2018 година, кога си дава оставка поради серијата падови на вредноста на турската лира.
Неговото именување може да значи напуштање на неортодоксните економски политики на Ердоган во последните неколку години, што на пример вклучуваше задржуање на ниските каматни стапки и покрај високата инфлација и значителната државна контрола на пазарите.
Познато е дека Шимшек беше противник на таквите политики на Ердоган. Турција се бори со економска криза веќе подолго време, во која инфлацијата достигна 85% во октомври 2022 година, пред да се спушти на 44% во мај. Од почетокот на годината, турската лира има загубено 10% од нејзината вредност во споредба со доларот.
Извор: 360stepeni.mk
