Зеленски во Хаг: Сите сакаме да го видиме Владимир овде

Во март, МКС издаде налог за апсење на Путин поради сомневање дека депортирал деца од Украина, а Европската комисија објави дека во Хаг ќе се формира меѓународен центар за гонење на злосторствата за агресија во Украина

Рускиот претседател Владимир Путин мора да биде изведен пред лицето на правдата за војната во Украина, изјави денеска украинскиот претседател Володимир Зеленски за време на посетата на Хаг, каде што е седиштето на Меѓународниот кривичен суд (МКС).

Во март, МКС издаде налог за апсење на Путин поради сомневање дека депортирал деца од Украина, а Европската комисија објави дека во Хаг ќе се формира меѓународен центар за гонење на злосторствата за агресија во Украина.

„Сите сакаме да видиме еден поинаков Владимир овде во Хаг, оној кој заслужува да биде санкциониран за своите криминални дејствија овде, во главниот град на меѓународното право. Сигурен сум дека ќе го доживееме тоа кога ќе победиме. Оној што води војна мора да биде осуден“,

рече Зеленски за време на неговата прва официјална посета на Холандија, мислејќи на Путин.

Русија, која не е членка на МКС и не ја прифаќа неговата јурисдикција, негира дека извршила злосторства за време на војната во Украина, која ја нарекува „специјална операција“ за „демилитаризација“ на својот сосед.

Претходно денеска Зеленски го посети Меѓународниот кривичен суд.

МКС соопшти дека посетата траела помалку од еден час, но не даде детали за што разговарале.

Од почетокот на руската инвазија во 2022 година, украинскиот лидер посети многу главни градови, вклучувајќи ги Лондон, Париз и Вашингтон. Холандија силно ја поддржува Украина, а нејзиниот премиер Марк Руте во февруари рече дека не е исклучено да обезбеди и воена поддршка за Киев сè додека тоа не го доведува НАТО во конфликт со Русија.

Зеленски, кој претходно во текот на денот се сретна со холандски претставници, ќе има средби и со холандскиот премиер Руте и белгискиот премиер Александар Де Кро.

МКС може да суди геноцид во Украина, но нема јурисдикција над наводните злосторства извршени од Русија.