ИСТАНБУЛ (АА) – Шефовите на дипломатиите на Саудиска Арабија и Иран се состанаа денес во Пекинг, првпат по повеќе од седум години, објавија кинеските државни медиуми, пренесува Анадолу.
Министерот за надворешни работи на Саудиска Арабија, принцот Фајсал бин Фархан ал Сауд, се состана со неговиот ирански колега Хусеин Амир-Абдолахиан денес во Пекинг, објави кинеската телевизија ЦГТН.
Состанокот се случи откако Ријад и Техеран минатиот месец ненадејно најавија обновување на дипломатските односи, со посредство на Кина.
Се очекува двете држави повторно да ги отворат амбасадите во главните градови до наредниот месец.
Иран и Саудиска Арабија ги прекинаа своите односи откако демонстранти, во јануари 2016 година, упаднаа во Амбасадата на Саудиска Арабија во Техеран по егзекуцијата на водачот на шиитските муслимани Нимр ал-Нимр.
Од април 2021 година двете страни беа ангажирани во маратонски разговори олеснети од Багдад и Мускат, но кинеската интервенција беше таа што резултираше со пробив минатиот месец.
Извор: www.aa.com.tr
