Министерката за енергетика, рударство и минерални суровини, Сања Божиновска, на 18 и 19 ноември ќе учествува на Седмиот состанок на Партнерството за трансатлантска енергетска соработка (P-TEC) во Варшава, Полска, организиран во соработка со Атлантскиот совет.

Според најавата, форумот ќе обедини високи владини претставници, меѓународни институции и лидери од енергетскиот сектор на Европа и САД. Меѓу најавените учесници се американскиот секретар за енергетика Крис Рајт, полскиот премиер Доналд Туск и министерот за енергетика Милош Мотика.
Божиновска ќе биде панелист на сесија посветена на европската енергетска безбедност, отпорноста на критичната инфраструктура и диверзификацијата на изворите на снабдување.
Министерката го оцени учеството како можност за продлабочување на стратешките партнерства, размена на искуства и унапредување на соработката со европските и американските партнери.
„Наш приоритет останува изградбата на сигурен, стабилен и конкурентен енергетски систем, поврзан со регионалните и европските енергетски пазари“, порача Божиновска.

