Силни поројни дождови викендов го погодија Големиот Кањон во Аризона, при што еден човек загина, а најмалку 14 се водат како исчезнати, објави „Еј-би-си њуз“.
Невремето ги поплави камповите и пешачките патеки во долниот дел на националниот парк, а спасувачите ги евакуираа планинарите со хеликоптери.
Националната служба за паркови (НПС) синоќа соопшти дека од реката во паркот било извлечено тело. Идентитетот на загинатиот не е објавен.
„Националната служба за паркови ги повикува сите што имаат информации за планинари или за кампери кои на 29 август се наоѓале во внатрешноста на кањонот, долж коридорот Брајт Енџел Крик, како и луѓето кои имале резервации за кампување во погодената област, да ги достават информациите до Истражната служба на Националната служба за паркови“, се наведува во соопштението.
Вкупно 62 луѓе биле евакуирани со хеликоптери од Фантом Ранч и од долниот дел од патеката Северен Кајбаб.
Евакуираните биле префрлени во објект на јужниот раб на Големиот Кањон, каде што Американскиот Црвен крст обезбедува помош.
Засега нема информации за други повредени, а од денеска нема да биде дозволено ноќевање во хотелите.
„Повеќе кампови и патеки се затворени до понатамошно известување и засега нема проценка кога погодените области ќе бидат повторно отворени“, соопшти НПС.
Од НПС предупредија дека во текот на денешниот ден во областа се можни дополнителни грмежи и обилни врнежи, кои може да предизвикаат нови поројни поплави и одрони на камења.
Извор: vecer.mk
