Американските сили вечерва нападнаа ирански ракетни лансери на островот Ларак во Ормутскиот теснец, објавија американските претставници. Ова е првиот американски воен напад врз Иран во последниот месец.
Два лансери управувани од членови на Иранската револуционерна гарда беа погодени во нападот, дознаваат Асошиејтед Прес и Фајненшл Тајмс.
Според американскиот функционер, иранските сили подготвувале ракети и морски мини за да дејствуваат во теснецот. Функционерот зборуваше под услов да остане анонимен бидејќи станува збор за чувствителни воени информации.
Иран: Има мртви и ранети
Полуофицијалните медиуми на Иран претходно објавија експлозии во близина на островот Ларак. Според нивните изјави, нападот бил извршен со беспилотни летала, но американската страна сè уште не објавила детали за употребеното оружје.
Иранската револуционерна гарда го потврди нападот и објави дека меѓу нејзините членови и цивилите има мртви и ранети. Точниот број на жртви не беше прецизиран.
Гардата објави дека нападот ќе доведе до „казнување на агресорот“, со што најави одговор на американската акција.
Американците ги отстранија мините минатата недела
Нападот се случи откако американската војска минатата недела објави дека завршила со отстранувањето на морските мини од меѓународните водни патишта низ Ормутскиот теснец.
Иран тврди дека сè уште контролира голем дел од теснецот благодарение на ракетите, беспилотните летала и можноста за поставување нови мини. Иранската револуционерна гарда пред два дена објави дека има „целосна контрола“ врз тој стратешки важен морски премин, отфрлајќи ги американските тврдења дека пловидбата низ него е повторно слободна.
Поморскиот сообраќај низ теснецот е сè уште значително послаб отколку пред почетокот на војната, а бродовите се под закана од мини, ракети и беспилотни летала. Иран неодамна стави на црната листа 45 танкери и се закани дека ќе ги притвори, ќе ги казни и ќе им го заплени товарот за наводно кршење на неговите правила за премин.
Првиот американски напад за еден месец
Ормутскиот теснец е еден од најважните поморски патишта во светот. Пред војната, приближно една петтина од светската нафта и течен природен гас минувале низ него, поради што секој нов конфликт во таа област може да влијае на цените на енергијата и на светската економија.
Денешниот напад го прекина едномесечниот застој во директните воени операции на САД против Иран. Во последните недели, администрацијата на американскиот претседател Доналд Трамп повеќе се потпираше на санкции и економски притисок, но најновиот напад и најавата на Иран за одмазда повторно ја зголемуваат опасноста од поширока ескалација.
Конфликтот меѓу САД, Израел и Иран трае повеќе од шест месеци, а дипломатските обиди за негово запирање досега не донесоа траен договор.
Ирански ракети ги таргетираат американските бази во Јордан
Иран лансира балистички ракети од целата земја, во бран од големи размери. Досега, Техеран, Карај, Источен Азербејџан, Урмија, Западен Азербејџан, Занџан, Шираз, Лорестан и Хорамабад.
Пред неколку минути, првата цел беше повеќекратна експлозија во американската база Мувафак Салти во Јордан.
Извор: vecer.mk
