AfD сè уште држи над 40 проценти во анкетите на јавното мислење пред регионалните избори во Саксонија-Анхалт на 6 септември, а дебатата за можна забрана на AfD продолжува во Германија. Пред еден месец, петицијата за забрана беше потпишана од илјада адвокати.
Британската Би-Би-Си ја нарекува изборната кампања битка за нацистичкото минато на Германија. AfD сака да ја замени повоената германска култура на сеќавање, во која нацистичката одговорност за злосторството на холокаустот и за милионите убиени низ Европа во Втората светска војна, со нов патриотизам.
Многу поддржувачи на AfD веруваат дека денешна Германија треба да биде горда на својата историја и да стави помал акцент на нацистичкото минато. Во својата програма, AfD најавува откажување на финансирањето за „антигерманска“ уметност, радикално намалување на финансирањето за граѓанското општество и реформа на училиштата, така што децата ќе учат помалку за Хитлер, а повеќе за Бизмарк. Германската култура на сеќавање се нарекува комплекс на вина.
Тоа е тврдење што предизвикува длабоки поделби во земјата, наведувад Би-Би-Си.
– Не можете да ја избришете историјата, но Втората светска војна повеќе нема никаква врска со нас, вели 50-годишниот Герд, поддржувач на AfD од германскиот град Керфурт.
Тој истакнува дека треба да гледаме кон иднината и кон историјата пред нацистичката ера, кога земјите што зборуваат германски јазик биле познати по поети и мислители. AfD не ги негира злосторствата на националсоцијализмот. Но, училиштата, музеите, театрите и универзитетите, според нив, треба помалку да се занимаваат со таа тема.
Расистички идеи
Уште во 2023 година, Сојузната канцеларија за заштита на уставниот поредок ја прогласи AfD во Саксонија-Анхалт за екстремистичка организација. Тие утврдија дека овој огранок на AfD е антидемократски, а нејзините цели се проткаени со расистичка идеологија. По изборите, тие би можеле да бидат во позиција сами да ја формираат владата во таа германска федерална држава, за прв пат во 13-те години постоење на партијата.
Тие објавија дека сакаат да го променат начинот на кој се изучува германската историја во Саксонија-Анхалт, ќе ја променат наставната програма со тоа што ќе стават поголем акцент на 19 век, пред Првата и Втората светска војна. Училиштето ќе започне со кревање на германското знаме наутро. Тие исто така најавуваат дека подобро ќе се грижат за спомениците на германските војници.
Според анкетите, AfD би можела да освои парламентарно мнозинство во Саксонија-Анхалт, но тоа не е неизбежно. Доколку ја преземат покраинската влада, би добиле авторитет врз културата, полицијата и образованието.
Ханс-Томас Тилшнајдер, кој ја дизајнираше програмата на AfD, рече дека секако националсоцијализмот сè уште ќе се изучува, „но малку помалку“. Идејата е „Повеќе Бизмарк, помалку Хитлер“, повеќе од 19 век, помалку од 20 век. Повеќе германска величина, помалку криминал.
Главниот кандидат на AfD во Саксонија-Анхалт, Улрих Зигмунд (35), во интервју за Би-Би-Си, ја бранеше патриотската програма на партијата: тој истакнува дека најнормалното нешто на светот е луѓето да бидат горди на својата земја. „Сакаме да ја вратиме. Имаме богата историја што се протега стотици години наназад и сакаме да ја учиме таа историја во целост, со сите нејзини подеми и падови, но со гордост и позитивен поглед на светот“, рече тој.
Во Керфурт, луѓето чекаа во ред со часови за да се фотографираат или да се ракуваат со Зигмунд додека тој весело потпишуваше примероци од списанието Der Spiegel, кое го именуваше за најопасниот човек во Германија на насловната страница. AfD го сфати тоа како реклама. Пред една година, влијателниот член на AfD Бјорн Хеке, кој ја води партијата во сојузната покраина Тирингија, го нарече Споменикот на холокаустот во Берлин „споменик на срамот“.
Еден од аргументите за забрана на AfD беше откритието во 2024 година дека претставници на AfD се сретнале со Австриец со неонацистичко минато, Мартин Селнер, раководител на крајно десничарското идентитаристичко движење. Главниот кандидат на AfD во Саксонија-Анхалт, Улрих Зигмунд, исто така беше присутен на состанокот во Потсдам. Селнер е гласен поддржувач на ремиграцијата, термин кој исто така влезе во програмата на AfD, и се однесува на депортација дури и на германски граѓани ако еден од нивните родители не е роден во Германија.
Хитлер за музејот
Оние кои ја споредуваат AfD со нацистите гледаат сличност во културната политика и гласната најава дека ако AfD победи во Саксонија-Анхалт, тоа ќе ја намали финансиската поддршка за „антигерманска“ уметност. Нацистите палеа книги и прогонуваа уметници, во 1937 година организираа „изложба на дегенеративна уметност“. AfD тврди дека парите на даночните обврзници треба да одат во уметност што помага во негувањето на германскиот идентитет. Тие придаваат големо значење на културата, бидејќи таа треба да служи на нова цел: повторно да ги направи Германците горди, објавува порталот „Швајс Хојте“ во голем извештај во пресрет на изборите што би можеле да означат историска пресвртница.
Ханс-Томас Тилшнајдер (48), задолжен за образовната политика на АфД во Саксонија-Анхалт, истакнува дека Хитлер треба да биде во музеј. Според програмата на АфД, секој што сака јавно финансирање треба „да придонесе за формирање на германскиот идентитет“. Повеќе нема да има државно финансирање за „антигерманска уметност“, вели Тилшнајдер, наведувајќи како негативни примери претстава во која се критикува АфД и феминистичката оперска продукција. Тој ќе го воведе „Фестивалот на германски песни“, каде што ќе се негуваат патриотски песни. Култот на вината и „минатото што никогаш не поминува“ припаѓа во музеј, според AfD.
Извор: vecer.mk
