Политичката партија ВЛЕН излезе со остра реакција во која го коментира актуелниот случај поврзан со Артан Груби, но и политичките позиции на Бујар Османи и неговиот однос кон случувањата во ДУИ.
„Денес „пеењето“ на Бујар Османи добива поинакво значење: Артан Груби е пред правдата, додека Бујар продолжува да го чека моментот за да го направи чекорот кон челната позиција во ДУИ“, наведува ВЛЕН.
Од партијата посочуваат дека Османи со месеци молчел за Груби, иако во минатото двајцата биле меѓу највисоките функционери на ДУИ. Според ВЛЕН, денес Османи се однесува како да немале заедничка политичка историја.
ВЛЕН го обвинува Османи дека мандатот како министер за надворешни работи го користел и за внатрепартиски пресметки и политички калкулации поврзани со борбата за раководната позиција во ДУИ.
„Денес сценариото станува сè појасно: Груби пред судот, Али Ахмети под притисок, а Бујар ја чека фотелјата на претседател на ДУИ“, стои во реакцијата на партијата.
Од ВЛЕН прашуваат зошто Османи молчел за Груби во периодот кога двајцата биле на врвот на ДУИ и што знае за случувањата во партијата.
„Зошто денес се однесува како Груби никогаш да не постоел?“, прашува ВЛЕН, додавајќи дека во политиката не е важно само кој зборува, туку и зошто некој молчел до сега.
Партијата му порача на Османи јавно да објасни дали неговите критики и политички настапи биле мотивирани од борбата за правда или од политички интереси и амбиции за преземање на раководната позиција во ДУИ.
„Ако „пеењето“ на Бујар било за правда, нека го каже отворено. Ако било за власт и за фотелјата на Али Ахмети, тоа веќе сите го разбираат“, наведува ВЛЕН.
Во завршницата од реакцијата, ВЛЕН порачува дека Груби треба да одговори пред правосудните органи, додека Бујар Османи, како политичар, треба да им одговори на граѓаните.
„Груби нека одговара пред правдата. Бујар нека им одговори на граѓаните“, порачува ВЛЕН.
