Општина Битола во соработка со Центарот за јавно здравје, денес започна со спроведување на дополнителната дезинсекција, како што беше најавено пред една недела (https://www.bitola.gov.mk/ќе-се-спроведува-дополнителна-дезинс/).
Потребата за дополнителна, вонредна ларвицидна и адултицидна дезинсекција, општината тогаш ја воочи имајќи ја предвид актуелната епидемиолошка состојба во земјата, односно прогласената епидемија на Западнонилска треска на подрачјето на дел од Скопје, како и неопходноста од засилување на превентивните мерки за контрола на комарците како вектори на заболувањето.
Градоначалникот на општина Битола, Тони Коњановски, денес присуствуваше на терен заедно со екипите од Центарот за јавно здравје, кои ја спроведуваат дезинсекцијата.
„Како Општина Битола, спроведуваме вонредна ларвицидна дезинсекција, за оние ларвени облици на комарецот, а од 23.08 до 27.08 ќе спроведуваме и адултицидно третирање за зрелите форми на комарците. Да напоменам дека, Општина Битола, редовно ги спроведува превентивните мерки во континуитет од 2005 година. Општината се третира на критичните точки кои ги означува Центарот за јавно здравје и ова е една вонредна мерка во интерес на заштита и превенција од болестите кои ги пренесуваат комарците, меѓу кои и WNV (West Nile virus) вирусот“, рече градоначалникот Коњановски.
Директорката на Центарот за јавно здравје, Светлана Поповска Кљусева, информираше дека ова година, во Битола не е регистриран случај на западнонилска треска, а Општина Битола, целосно според Планот и програмата ги спроведе и адултицидната и ларвицидната дезинсекција.
„Ќе се спроведат и вонредни адултицидна и ларвицидна дезинсекција, но мора да нагласиме дека комарците се вектори на поголем број заразни заболувања, не само на западнонилската треска и затоа во решавањето, контролата на комарците треба сите граѓани да учествуваме. Тоа, не е проблем само на локалната самоуправа, иако локалната самоуправа во Битола, комплетно ги има спроведено досега сите мерки, но и ние како граѓани, мора да придонесеме во мерките за превенција. Застоените води во дворовите мора да бидат исчистени од страна на граѓаните, сите води кои што се во саксии, во кутии, да се покријат бунарите, резервоарите, да се исчистат олуците. Исто така, важно е да се постават заштитни мрежи на вратите и прозорците, граѓаните лично можат да користат репеленти, тоа се спрејови, гелови, стикови кои се прскаат на телото со цел да се одбијат комарците, да се избегнува излегување кога се комарците најактивни, навечер и во раните утрински часови, а кога се излегува во тој период да се носи облека со долги ракави и ногавици“, апелира директорката на Центарот за јавно здравје, Светлана Поповска Кљусева.
Општина Битола и во следниот период, продолжува со континуирана координација и соработка со Центарот за јавно здравје – Битола и внимателно ја следи епидемиолошката состојба. Согласно стручните препораки на надлежните здравствени институции и проценката на ризикот, Општината навремено ќе ги презема сите потребни превентивни мерки со цел заштита на здравјето на граѓаните и спречување на евентуални ризици по јавното здравје.
