ЈКП „Водовод“ – Битола соопшти дека континуирано спроведува строга контрола на квалитетот на водата за пиење, при што во изминатите три години се реализирани повеќе од 16.600 лабораториски анализи кои потврдуваат дека водата што се испорачува до корисниците ги исполнува сите пропишани стандарди за безбедност и квалитет.
Како што информираат од претпријатието, преработката на водата се врши во Филтерската станица Дихово, каде Одделението за санитарна контрола и третман на вода за пиење обезбедува 24-часовен мониторинг на процесот на третман и на квалитетот на водата.
Во периодот од 2023 до 2025 година биле извршени вкупно 16.622 лабораториски анализи, од кои 8.786 физичко-хемиски и 7.836 микробиолошки. Тоа претставува повеќе од 5.400 анализи годишно, односно во просек околу 15 анализи секој ден.
Контролата се спроведува на примероци од суровата вода, финалната вода во Филтерската станица, како и на бројни пунктови низ целата водоснабдителна мрежа. Дополнителни испитувања се вршат и при отстранување дефекти, пуштање во употреба на нови водоводни линии и по пријави од граѓаните.
Од ЈКП „Водовод“ – Битола нагласуваат дека, покрај интерната лабораториска контрола, квалитетот на водата редовно се проверува и од овластени и акредитирани надворешни лаборатории, согласно важечките законски прописи.
Испитувањата се реализираат во согласност со Правилникот за барања за безбедност и квалитет на водата за пиење, а резултатите од анализите покажуваат дека водата која се испорачува преку водоснабдителниот систем на ЈКП „Водовод“ – Битола ги исполнува сите законски барања за безбедност и квалитет.
Од претпријатието најавуваат дека и во иднина ќе продолжат со континуираниот мониторинг и унапредување на процесите, со цел на граѓаните да им обезбедат сигурна, безбедна и квалитетна вода за пиење.
