Жителите на неколку скопски населби и приградски општини вечерва се соочуваат со сериозен прекин во водоснабдувањето. Како што соопштија од ЈП „Водовод и канализација“ – Скопје, дефектот се случил на главната водоводна цевка во населбата Кисела Вода.
Поради уличен дефект со голем профил Ф-600 мм на улица „Борис Трајковски“ бб (лоциран точно пред главниот влез на поранешната фабрика ОХИС), водоснабдувањето е прекинато од 18:30.
Без вода во моментов се корисниците од следните населени места:
-Пинтија и Усје
-Долно Лисиче и Драчево
-Батинци, Студеничани, Моране и Зелениково
Екипите на јавното претпријатие се веќе на терен и работат на отстранување на дефектот, а нормализирање на состојбата се очекува по неговото целосно санирање во текот на ноќта.
Ова е втор сериозен инцидент со водоводната мрежа во овој дел од градот денеска. Претходно утрово, околу 09:00 часот, беше регистриран уште еден дефект во непосредна близина – кај бензинската пумпа на „Лукоил“ на истата улица, што предизвика проблеми со притисокот и водоснабдувањето во околните објекти во текот на претпладнето.
Извор: zurnal.mk
