Најмалку едно лице го загуби животот, а 38 се повредени во силниот земјотрес со јачина од 6,7 степени според Рихтеровата скала што во вторникот го погоди островот Сулавеси во централниот дел на Индонезија.
Според податоците на надлежните служби, епицентарот бил регистриран на околу 43 километри југоисточно од градот Палу, на длабочина од десет километри.
Силното тресење предизвикало паника меѓу жителите, кои масовно ги напуштале домовите и зградите и се упатувале кон отворени простори. Палу, главниот град на покраината Централен Сулавеси, има околу 400.000 жители.
Портпаролот на Националната агенција за управување со катастрофи, Абдул Мухари, соопшти дека неколку болници биле принудени да ги евакуираат пациентите. Според првичните информации, 38 лица биле пренесени во болница, од кои 13 се здобиле со потешки повреди.
Земјотресот предизвикал значителна материјална штета. Оштетени се најмалку 67 куќи, шест верски објекти, четири јавни објекти, два моста, две владини згради и три деловни објекти.
Извор: vecer.mk
