Политичката партија ВЛЕН ја поздрави посетата на претседателот на Европскиот совет, Антонио Кошта, оценувајќи ја како значајна потврда на европската перспектива на Македонија.
Во соопштението, ВЛЕН наведува дека првиот вицепремиер и министер за европски прашања, Беким Сали, го пречекал Кошта во Скопје, при што посетата била оценета како охрабрување за продолжување на реформите и процесите што ја доближуваат државата до членство во Европската Унија.
„Интеграцијата во Европската Унија е наша стратешка определба и стремеж на цели генерации. Посетата на претседателот Кошта претставува поттик за со уште поголема посветеност да продолжиме со реформите и процесите што ја приближуваат земјата до европското семејство“, се наведува во соопштението.
Од ВЛЕН истакнуваат дека ќе продолжат да даваат институционален придонес во евроинтегративниот процес преку првиот вицепремиер и министер за европски прашања Беким Сали, ставајќи ја реформската агенда во центарот на активностите поврзани со европската интеграција.
Партијата додава дека останува посветена на градењето целосно европска иднина за сите граѓани на Македонија преку работа, дијалог и спроведување реформи.
