Македонските возила за урбана хигиена „Грин Машинс“, кои се произведуваат во БРАКО во Велес, привлекоа големо внимание на престижниот светски саем ИФАТ во Минхен — еден од најзначајните меѓународни настани посветени на технологии за животна средина, комунална опрема и одржлива урбана инфраструктура.
На саемот, македонската компанија ги претстави своите најсовремени решенија за одржување на урбаната хигиена, рамо до рамо со водечки производители од Швајцарија, Франција, Италија, Германија, САД и други земји.
Од „Грин Машинс“ посочуваат дека светскиот пазар сè повеќе бара разновидни и еколошки решенија, па затоа компанијата нуди возила со електричен, дизел и водороден погон, прилагодени на различните потреби на градовите и комуналните служби.
Успехот на БРАКО и „Грин Машинс“ се потврдува и преку извозните резултати. Дури 98 проценти од производството се пласира на странски пазари, во повеќе од 60 земји низ светот. Последната голема испорака беше реализирана во Саудиска Арабија, каде во главниот град Ријад беа испорачани 52 возила за одржување на урбаната хигиена.
„Грин Машинс Македонија“ веќе има воспоставено компании-ќерки во Обединетото Кралство, Холандија и САД, со што дополнително го зацврстува своето присуство на глобалниот пазар.
Учеството на ИФАТ уште еднаш потврди дека македонската индустрија може успешно да конкурира на светската сцена со иновативни, ефикасни и еколошки решенија.
