Градоначалникот на Општина Битола, Тони Коњановски, информира дека денеска се одржал работен состанок во ЈП „Водовод“ Битола, на кој заедно со директорот Андреј Гинов и претставници од Швајцарската амбасада биле разгледани активностите за реализација на проект за надминување на постојните предизвици во водоводниот систем.
Проектот е насочен кон модернизација на целокупната водоводна инфраструктура и опфаќа прецизна евиденција и контрола на потрошувачката, воведување SCADA систем, поставување современи водомери, како и унапредување на наплатата и намалување на загубите на вода, со посебен фокус на руралните средини.
Коњановски истакна дека иницијативата произлегува од реалната потреба за технолошка модернизација и дигитализација на системот, со цел поефикасно управување со водните ресурси и подобрување на услугите за граѓаните.
На состанокот било нагласено и значењето на соработката со европските фондови, чија поддршка овозможува имплементација на современи решенија и забрзување на развојните процеси во јавните претпријатија.
Овој проект претставува прва фаза од поширок процес на трансформација, кој во иднина треба да доведе до целосна дигитализација на водоводната мрежа, вклучително и автоматизирано отчитување во руралните средини.
Според најавите, со инвестиции во инфраструктурата и дигитални решенија се очекува зголемена ефикасност, намалување на загубите на вода и одржливо управување со водните ресурси во општина Битола.
