Здружението „Градиме иднина“ од Скопје, во соработка со Министерството за внатрешни работи и Министерството за социјална политика, демографија и млади, го продолжува проектот „Стоп против питачењето и злоупотребата на децата и нивното здравје“.
Од Здружението бараат да се почитува усвоениот акциски план и надлежните да постапуваат според него за отстранување на питачите, како и да го почитуваат меѓусекторскиот протокол за постапување со децата од улица. Очекуваат овој нивни апел до надлежните институции да вроди со плод и, конечно, државата да започне сериозно да се занимава со овој децениски проблем и да се пристапи најсериозно кон решавање, еднаш засекогаш, на статусот и положбата на децата питачи.
Од Здружението велат дека деновиве имале работен состанок со министерот за внатрешни работи, Панче Тошковски, за негово запознавање со содржината на целиот овој проект, за кој велат дека со години не бил мрднат од мртва точка.
– Полицијата на терен повеќе од 27 години не го решава проблемот со отстранување на питачите во целата држава. Во овој проект целосно се вклучени и Владата, ОЈО Скопје, Републичкото јавно обвинителство. Здружението бараше од МВР да се почитува акцискиот план на МВР, кој го изготви за отстранување на питачите, и излегување на терен еднаш или два пати неделно, од сите полициски станици, да се опоменуваат и отстрануваат питачите и чистачите на автомобилски стакла, затоа што пречат на раскрсниците и ја загрозуваат сопствената безбедност и воопшто, безбедноста во сообраќајот – соопштија од „Градиме иднина“.
Притоа додаваат дека се вложиле во овој проект со голема работа и труд во изминатите четири години и четири месеци.
– Досега се отстранети питачите откај Железничката станица во Скопје, кај Качанички пат, булеварот „Партизански одреди“ кон раскрсницата кај „Мида“, кај МПЦ, како и кај трговскиот центар „Сити мол“ – информираат од Здружението „Градиме иднина“
Најавуваат дека во наредниот период ќе се отстрануваат питачите кај ТЦ „Мавровка“, во Старата скопска чаршија, Камениот мост, од булеварот кон Судска палата, па сè до трговскиот центар „Ист гејт“, како и од булеварот кај Автокоманда, кон дирекцијата на Бригадата за противпожарна заштита на Град Скопје, кај Факултетот за земјоделство, шумарство и водостопанство кон „Алкалоид“, кај поранешниот дом „Ранка Милановиќ“, во Ново Лисиче кај ТЦ „Бисер“и на булеварот „Србија“.
Исто така, ќе се постапува и во општините Бутел, Гази Баба, Кисела Вода, Карпош, Ѓорче Петров, Центар, како и во градовите: Тетово, Гостивар, Кичево, Струга, Охрид, Битола, Прилеп, Кавадарци, Неготино, Велес, Кочани, Штип, Пробиштип, Берово, Виница, Делчево, Македонска Каменица, Струмица и сите други во Македонија.
Од „Градиме иднина“ нагласуваат дека ќе биде доставен овој допис до Владата, до МВР – кабинетот на министерот, МТСП, Центарот за социјални работи Скопје, Одделот за внатрешна контрола на МВР, ОЈО Скопје и до Републичкото јавно обвинителство.
(А. П.)
Извор: zurnal.mk
