Тренерот на Манчестер сити, Пеп Гвардиола, изјави дека апсолутно нема да му застане на патот на Родри доколку шпанскиот репрезентативец посака трансфер во Реал Мадрид.
Гвардиола рече дека се надева дека Родри ќе остане и по истекот на неговиот тековен договор, но призна дека би му одобрил да замине доколку 29-годишниот играч од средниот ред изрази желба да се пресели во Мадрид.
Родри, кој има 293 настапи за Сити откако пристигна во 2019 година, за време на репрезентативната пауза изјави дека би бил отворен за трансфер во Реал, нагласувајќи дека „не можеш да ги одбиеш најголемите клубови во светот“.
Говорејќи пред четвртфиналниот натпревар од ФА купот против Ливерпул, Гвардиола изјави дека „апсолутно“ нема да го спречи ако сака да замине.
„Нема играч што би ја одбил шансата да игра за Реал Мадрид“, рече Гвардиола.
„Мојата желба е Родри да остане што е можно подолго во клубот, бидејќи е неверојатен, тој е врвен играч.“
Гвардиола додаде дека Родри покажал колку е поврзан со клубот, но истакна:
„Клубот е над сите нас, ако некој играч не е среќен, треба да си замине, а ние продолжуваме. Ако е среќен, треба да остане, и мислам дека е среќен.“
„Ако не е среќен, нека тропне на вратата кај спортскиот директор, да се прифати понуда според неговиот квалитет и потоа веќе не му припаѓа на клубот, туку само на себе.“
Тој додаде дека знае што сака клубот:
„Ми кажаа дека сакаат Родри да остане, да остане, да остане. Јас имам позитивно чувство, но на крајот на краиштата, не знам.“
Родри со Сити освои четири титули во Премиер лигата, една во Лигата на шампионите, ФА Куп и три Лига купови.
Сепак, во последните сезони има помала улога поради повредите, пропушти поголем дел од претходната сезона поради проблем со коленото, како и значаен дел од оваа сезона поради повреда на задната ложа.
Неговиот договор со Сити истекува следното лето, а Родри изјави за шпанските медиуми:
„Имам уште една година од договорот, ќе дојде момент кога ќе треба да седнеме и да разговараме.“
На прашањето за интересот од Реал Мадрид и дали би играл за „кралскиот клуб“, иако претходно настапуваше за Атлетико Мадрид, Родри рече:
„Имало многу играчи што го направиле тој потег. Според мене, не можеш да ги одбиеш најдобрите клубови во светот.“ – Пренесува „ТНТ спортс”.
Извор: kurir.mk
