Голем скандал во Лига 1, секако и голем срам за европскиот шампион. Француската фудбалска лига денеска го одложи натпревар помеѓу Ланс и Пари Сен Жермен за 13 мај, за да му се овозможи на парискиот клуб подобро да се подготви за четвртфиналето од Лигата на шампионите против Ливерпул.
Првенствениот натпревар помеѓу Ланс и Пари Сен Жермен требаше да се игра на 11 април, помеѓу двата четвртфинални дуели од Лигата на шампионите помеѓу парискиот клуб и Ливерпул, но според одлуката на Лигата, тој ќе се игра на 13 мај, помеѓу последните две кола од француското првенство.
Лидерот Пари Сен Жермен има бод и натпревар помалку во однос на второпласираниот Ланс. Ланс оваа недела одби да го одложи натпреварот и изјави дека Лигата „се сведе на задоволување на европските амбиции на одредени страни“.
Одлука која секако дека му оди и тоа како во прилог на ПСЖ.
Натпреварот помеѓу Стразбур и Брест на 12 април исто така е одложен, бидејќи се игра помеѓу четвртфиналето од Конференциската лига, која Стразбур ја игра против Мајнц.
Лигата објави дека раководството едногласно одлучило да ги прифати барањата на Пари Сен Жермен и Стразбур и дека одлуката, за која не е потребно одобрение од Ланс и Брест, е донесена во интерес на францускиот фудбал.
Извор: vecer.mk
