На денешното рочиште за пожарот во кочанската дискотека „Пулс“, Дејан Рашков, раководител на општинскиот Сектор за финансии, изјави дека уплатите за лиценца и фирмарија не биле извршени директно од дискотеката, туку преку правните субјекти „Класик ДМ“ и „ММММ“.
Рашков појасни дека Општината нема надлежност за издавање лиценци за ноќни клубови или кабареа – тоа го прави Министерството за економија. Уплатите се делат по 50 отсто меѓу централниот и локалниот буџет, а во конкретниот случај вкупниот износ бил 246.000 денари, од кои половина легнале на сметката на Општина Кочани.
Сведокот истакна дека во даночниот регистар дискотеката „Пулс“ не постоела како правен субјект и дека не знае дали износот бил за лиценца за дискотека или кабаре. Тој додаде дека дознал за „Класик ДМ“ и „ММММ“ дури по трагичниот настан, и дека „ММММ“ е правен следбеник на „Класик ДМ“.
Во врска со инспекциски надзори, Рашков посочи дека инспекторите дејствуваат самостојно и независно и одговараат само пред градоначалникот, додавајќи дека не е запознаен дали во тој период бил извршен надзор врз објектот „Пулс“.
Тој потврди дека Општината само ја утврдува висината на надоместокот и дека правните лица вршеле уплати по тој основ, а сопственикот на дискотеката не е должен да извести за организација на настан.
