Министерката за енергетика, рударство и минерални суровини Сања Божиновска информираше дека се објавени списоците на граѓани кои добиле право на ваучер за купување и вградување инвертер клима уред, како дел од мерките за поддршка на ранливите домаќинства.
Според Министерството, право на оваа мерка добиле 4.070 ранливи домаќинства, кои ќе можат да добијат ваучер во вредност до 28.000 денари за набавка на инвертер клима уред со енергетска класа најмалку А+.
Граѓаните кои се на списокот ќе можат да ги подигнат своите ваучери во центрите за социјална работа во општините каде што живеат, во периодот од 18 март до 17 април.
По подигнувањето, ваучерот може да се искористи за купување и вградување инвертер клима уред најдоцна до 15 октомври 2026 година, кај компании со кои Министерството за енергетика, рударство и минерални суровини ќе склучи договор.
„Оваа мерка има за цел да обезбеди конкретна поддршка за домаќинствата на кои им е најпотребна, да се намалат трошоците за енергија и да се подобри енергетската ефикасност во домовите“, соопшти министерката Божиновска.
Списокот на корисници и деталите за постапката се објавени на веб-страницата на Министерството за енергетика, рударство и минерални суровини. За дополнителни информации, лицата кои се стекнале со право на ваучер можат да се обратат и на телефонските броеви 071-391-187 и 071-391-169 или на електронската адреса [email protected].
