Градоначалникот на Пробиштип, Тони Тоневски, по повод 100 дена од преземањето на функцијата, информираше за затекнатата состојба во општината, потенцирајќи дека биле констатирани сериозни финансиски и административни проблеми.
Тој посочи дека заклучно со 31 декември 2025 година, вкупниот долг на општината изнесувал 61.755.000 денари, односно нешто повеќе од еден милион евра, без да се пресметаат кредитните задолжувања.
„Покрај финансиските предизвици, затекнавме и сериозни слабости во административното функционирање. Имаше 429 предмети за легализација кои стоеле непотпишани со месеци и години, како и подготвени известувања до должници кои не биле доставени. Констатирани се и бројни непочитувани процедури и пробиени рокови“, истакна Тоневски.
Во име на општината, тој упати извинување до граѓаните за пропустите и најави воспоставување на поефикасен и професионален систем на работа.
Паралелно со стабилизацијата, општината веќе започнала со реализација на повеќе проекти, меѓу кои изградба на атмосферска канализација и потпорни ѕидови во Блок 7.5, замена на подот во спортската сала во ООУ „Никола Карев“, изградба на кошаркарско игралиште во Злетово, санација на резервоар за вода и реконструкција на планинарскиот дом „Црн Врв“.
Во тек се и активности за изградба на помали улици, пристапни патеки и чистење на диви депонии.
Во делот на дигитализацијата, Тоневски најави воведување електронска архива и дигитализација на доставата на даночни решенија, со цел подобрување на услугите кон граѓаните и бизнисите.
Општината донела и Програма за поставување урбана опрема, по неколкугодишна пауза, а поднесени се и апликации до Светска банка за проекти за енергетска ефикасност на Домот на култура и основното училиште „Браќа Миладиновци“.
Тоневски информира дека се изработуваат проекти за изградба на капела во Злетово, реконструкција на патишта во повеќе населени места, изградба на улици и уредување на јавни површини.
Со подобрување на временските услови се очекува интензивирање на градежните активности, при што се планирани реконструкции на повеќе улици, патишта и изградба на нов паркинг простор во Лесново.
Во наредниот период, општината ќе започне постапка за избор на претседатели на месните заедници, со цел поголемо вклучување на граѓаните во донесувањето одлуки.
Дополнително, во соработка со здравствените институции, од март ќе започнат бесплатни ортопедски прегледи за деца до 15 години.
Во областа на животната средина, најавено е и набавување мерни станици за следење на квалитетот на воздухот, како и активности за намалување на загадувањето.
Тоневски најави и формирање нова индустриска зона за лесна и незагадувачка индустрија, како и нова зона за домување, како дел од долгорочниот развој на општината.
„Ова се првите 100 дена – период на стабилизација и поставување цврсти темели. Нашата цел е јасна: финансиски стабилна, урбанистички уредена и развојно ориентирана општина која работи транспарентно и во интерес на граѓаните“, порача Тоневски.
