Со изложба на рачно изработени маски од ученици од основните и средните училишта, поставена во ликовниот салон на НУЦК „Марко Цепенков“, официјално започнаа активностите за прилепскиот карневал „Прочка 2026“.
Над 300 традиционални и модерни маски беа претставени на изложбата, со која се одбележуваат 25 години од постоењето на карневалот и 100 години од уникатната традиционална маска „Прилепски мечкари“. Дел од атмосферата беа и најмладите, маскирани токму како „Прилепски мечкари“, кои со својата енергија и радост ја збогатија манифестацијата.
Градоначалникот на Прилеп истакна дека карневалот „Прочка“ претставува еден од најубавите денови во годината за градот, ден кога традицијата и креативноста се спојуваат и го обединуваат целото локално население.
„Горд сум што традицијата продолжува да живее и да се надградува. Најубав доказ за тоа беа најмалите, маскирани како „Прилепски мечкари“, кои со својата радост и енергија ја збогатија изложбата, а веќе од утре ќе бидат дел и од карневалските случувања во нашиот град.“, порача градоначалникот.
Во рамки на изложбата беа доделени и награди за најдобрите маски во повеќе категории – од најмлади учесници, преку основци и средношколци, до награди за традиционална и најиновативна маска.
Карневалските случувања продолжуваат веќе утре, кога во 12:00 часот ќе се одржи Детскиот карневал, додека главната карневалска поворка е закажана за в недела, на 22-ри, со почеток во 13:00 часот, кога целиот град ќе биде под маски.
Според организаторите, годинава се пријавени над 500 групни и поединечни маски, а карневалот има и меѓународен карактер, со учество на групи од земјава и од странство. Програмата ќе биде дополнета со настапи на жонглери, кловнови, акробати и куклари.
Со почетокот на „Прочка 2026“, Прилеп уште еднаш потврдува дека знае да ја чува својата традиција, но и да ја слави креативноста, правејќи од карневалот настан кој го обединува градот и привлекува бројни посетители.
