Годинешното издание на „Зимска приказна“ уште еднаш покажа дека празниците во Битола не се само дел од календарот, туку заедничко искуство создадено од градот и неговите жители. Со силна поддршка од Општина Битола, локалната заедница, културните институции, образовните установи, уметниците и граѓаните, фестивалот ја потврди способноста на градот да организира современи, квалитетни и препознатливи манифестации.
Во периодот од 20 декември до 8 јануари, Битола живееше во ритамот на најголемиот зимски фестивал во државата, кој веќе неколку години по ред го редефинира празничното доживување и ја позиционира Битола како регионален центар на културниот и манифестациониот туризам.
Осум локации низ градот функционираа како една целина – од Плоштадот Магнолија, Широк Сокак и Офицерскиот дом, преку Пациото на музејот, Безистенот и Старата чаршија, до Bliss и Националниот парк Пелистер. Градот беше претворен во светлечка мапа на настани, каде што секој простор доби своја сцена и своја публика.
Бројките дополнително ја потврдуваат големината на настанот. „Зимска приказна 2025/2026“ понуди над 200 часа програма, од кои повеќе од 40 часа беа наменети за најмладите. На фестивалот настапија 67 бендови и над 20 соло изведувачи, а активно беа вклучени и образовни институции од јавниот и приватниот сектор. Програмата беше рамномерно распоредена на девет локации, а годинава за првпат со сопствени иницијативи се вклучи и приватниот сектор.
Посетителите имаа можност да уживаат во детско кино под отворено небо, уметнички содржини, гастрономија и зимски базар, голема концертна сцена кај Офицерскиот дом, алтернативна сцена во Пациото, мала сцена во Старата чаршија, како и вечерни DJ-сетови во празничниот автобус и во Безистенот. Посебен акцент беше ставен и на светлосното обликување, кое дополнително ја истакна елеганцијата и автентичноста на градот.
Од Општина Битола порачуваат дека „Зимска приказна“ продолжува да се развива, со јасна визија за уште посилно вклучување на заедницата и креирање на културни настани кои ќе го афирмираат градот и надвор од границите на државата.
