Градоначалникот на Битола, Тони Коњановски, во својата новогодишна честитка им се обрати на сограѓаните, истакнувајќи ја магијата на празничните денови и значењето на заедништвото.
„Има ли поубава радост, поубава приказна од новогодишните празници. А таа празнична магија веќе ги исполнува нашите срца и домови и не зближува со најблиските, пријателите и соработниците“, рече Коњановски.
Тој посочи дека старите достигнувања и предизвици од изминатата година се искористени за подобрување на градот, со вложувања во инфраструктурата, образованието, културата и спортот. „Верувам дека така ќе биде и во следната година, година на реализација на големи проекти“, додаде градоначалникот.
Коњановски ја нагласи и празничната програма „Зимска приказна“, која, според него, ја обединуваше целата заедница, привлече туристи и внесе топлина и радост во градот.
„Нова светлина, нова енергија, нова радост за граѓаните на Битола и сите гости. Убавината на промените ја создаваме заедно, со меѓусебно почитување, разбирање и поддршка“, порача Коњановски.
Тој ги повика граѓаните да празнуваат со радост во кругот на семејствата и им посака среќна и бериќетна Нова година и Божиќни празници.
