Советот на Општина Битола вечерва со 18 гласа „За“ го усвои буџетот за 2026 година, кој ќе овозможи развој и подобрување на животниот стандард на сите граѓани.
Основниот буџет за следната година изнесува 784.327.579 денари, а со додавање на пренесениот вишок приходи, средствата од ДДВ за 2025 година и средства по основ на склучени договори со министерствата, висината на основниот буџет достигнува 1.650.166.707 денари. Заедно со приходите од самофинансирачки активности, дотации и донации, вкупниот буџет на Општината ќе изнесува 3.107.580.972 денари.
Претседателот на Советот, Бојан Бојкоски, нагласи дека буџетот значи развој, еднаквост и иднина за сите граѓани. „Програмата за развојни планови изнесува 12,8 милиони евра, со значајни инвестиции во спорт, економски развој, инфраструктура и социјална заштита“, истакна Бојкоски.
Градоначалникот Тони Коњановски оцени дека усвоениот буџет е резултат на сериозна работа и внимателно планирање, со фокус на рамномерен развој на сите делови на општината, поддршка на младите, образованието и економскиот напредок. Тој најави транспарентна реализација на планираните проекти и отчетност пред јавноста, со цел Битола да продолжи да се развива.
