Градоначалникот на Општина Бутел, Дарко Костовски, остро реагираше по, како што вели, гласањето против развојните проекти од страна на советниците на ДУИ и ВЛЕН во Советот на Општина Бутел. Според Костовски, станува збор за конкретни проекти кои директно влијаат врз подобрувањето на животот на граѓаните, особено во населбите каде што живеат граѓани од албанска етничка припадност.
Меѓу проектите за кои, според него, било гласано против се: изградба на нова детска градинка во Бутел 2, инвестиции во водоводната мрежа во Љуботен, околу еден милион евра инвестиции во населбата Скопје Север, реновирање на фасадата на основното училиште „Петар Здравсковски Пенко“, изградба на нови улици во Љуботен и Визбегово, како и изградба на нов спортски центар во Бутел 1.
Костовски истакнува дека опозициските советници гласале против и социјалните мерки, како што се доделување на 5.000 денари за секое новороденче, како и против шемите за стипендии за најдобрите ученици и спортисти.
„Нивното образложение беше дека немало рамномерен развој, иако сите овие проекти се планирани во зони каде што живеат албански граѓани. Убеден сум дека никогаш не замислувале дека овие проекти ќе станат реалност“, изјави Костовски.
Костовски додава дека, според него, ирационалните одлуки се знак на политичка слабост, нагласувајќи дека граѓаните јасно гледаат што се случува и ќе ја дадат својата оценка.
„Со мене нема пазарења. Оваа лекција требаше одамна да ја научат. Пред нас е најуспешната година за Општина Бутел“, заклучува Костовски.
