СДСМ имала и ќе има многу поголеми личности од актуелниот претседател, никој од нив никогаш не се ставил над партијата, реагира преку социјалната мрежа на Фејсбук поранешниот директор на ТИРЗ и кандидат за претседател на СДСМ Јован Деспотовски откако претходно СДСМ најави негово исклучување од партијата.
-Искрено, после 30 години политички стаж најмалку очекував токму мојата матична партија да ме остави целосно без зборови и коментар.
Во сите јавни настапи сум бил максимално умерен дури и во ситуации и за луѓе кои апсолутно заслужиле остар став. Ако таа умереност сега станува закана за актуелниот партиски врв тогаш СДСМ има многу поголем проблем отколку што и мислиме.
СДСМ имала и ќе има многу поголеми личности од актуелниот претседател. И, никој од нив никогаш не се ставил над партијата, над нашето семејство. Тоа не е СДСМ, ниту некогаш ќе биде.
Една лична порака за крај или за почеток – Венко, со една одлука не можеш, ниту ќе дозволам да избришеш 30 години работа, љубов и жртва, пишува во својата реакција Деспотовски.
Извор: kurir.mk
