Менаџерот на Кристал Палас, Оливер Гласнер, по сè изгледа ќе го напушти лондонскиот клуб на крајот од сезоната, пренесува Фабрицио Романо, како и неколку англиски медиуми.
Договорот на австрискиот стратег истекува на 30 јуни 2026 година, а наводно нема намера да го продолжи.
Гласнер го предводи Палас од 2024 година и за многу кратко време успеа да направи големи работи на клупата на клубот. Ги освои ФА Купот и англискиот Суперкуп (Комјунити шилд), оваа сезона е главен фаворит во Конференциската лига, а неговиот тим игра многу атрактивен фудбал.
Поради сето тоа, тој се најде и на мета на бројни екипи од Премиер-лигата, меѓу кои има и клубови со поголемо реноме од Кристал Палас, а токму тоа најверојатно е главната причина поради која решил да си замине.
„Рекол дека е време за нов предизвик“, пренесуваат медиумите од Островот.
По 17 одиграни кола во Премиер лигата, Кристал Палас се наоѓа на осмото место на табелата со 26 бодови, а утре во рамките на 18. коло ќе го пречека Тотенхем од 17:30 часот.
Извор: vecer.mk
