„ТОКИО Електрик Пауер“ (ТЕПКО) планира да ја рестартира првата единица од својата нуклеарна централа Кашивазаки-Карива, најголемата во светот, на 20 јануари следната година, изјави претседателот на компанијата Томиаки Кобајакава.
Оваа недела, префектурното собрание во Ниигата, регионот каде што се наоѓа централата, даде зелено светло за делумно рестартирање на централата Кашивазаки-Карива. Ова ќе биде прв таков случај за ТЕПКО по топењето на нуклеарниот реактор Фукушима Даичи во 2011 година.
Кашивазаки-Карива, која се наоѓа на околу 220 км северозападно од Токио, беше меѓу 54-те реактори кои беа затворени откако земјотресот и цунамито во 2011 година ја оштетија централата Фукушима Даичи, во најтешката нуклеарна катастрофа во светот по Чернобил.
„Како компанија одговорна за несреќата во Фукушима Даичи, ќе ги примениме размислувањата и научените лекции. Ќе продолжиме со рестартирањето, прво по 14 години, почитувајќи ја безбедноста како врвен приоритет“, рече Кобајакава.
Извор: tv21
