Витаминот Д е клучен за
здравјето, но често е тешко да се внесе во доволни количини само преку
исхраната, поради што додатоците во исхраната се многу популарни.
Сепак,
за да ја максимализирате неговата ефикасност, важно е да знаете кога и како да
го земате. Иако многумина претпочитаат да го земаат наутро, додека други
избираат вечерни часови, клучот лежи во правилната апсорпција, пишува
Healthline.
Витаминот
Д е витамин растворлив во масти, што значи дека не се раствора во вода, туку
најдобро се апсорбира во крвотокот кога се внесува заедно со намирници богати
со масти. Затоа се препорачува земање додатоци на витамин Д со оброк за да се
подобри неговата апсорпција.
Едно
постаро истражување на 17 лица покажало дека земањето витамин Д со најголемиот
дневен оброк го зголемило нивото на овој витамин во крвта за околу 50% по само
два до три месеца. Слично на тоа, студија од 2014 година на 50 постари лица
утврдила дека внесувањето витамин Д со оброк богат со масти го зголемило
неговото ниво во крвта за 32% во рок од 12 часа во споредба со оброк без масти.
За
подобра апсорпција, вклучете здрави извори на масти во исхраната, како авокадо,
јаткасти плодови, семки, масна риба како лосос или сардини, полномасни млечни
производи и јајца.
Утрото како практичен избор
Многумина
се одлучуваат да го земаат витаминот Д наутро затоа што е попрактично и полесно
да се запамети, особено ако земате повеќе суплементи. Распоредувањето
суплементи во текот на денот може да биде предизвик, па создавањето навика за
земање витамин Д со појадок е одлично решение.
За
да обезбедите доследност, можете да пробате неколку едноставни трикови:
користете кутија за таблети, поставете аларм на телефонот или едноставно држете
ги суплементите блиску до трпезариската маса како визуелен потсетник.
Влијание врз сонот ако се зема
навечер
Постојат
и оние кои претпочитаат да го земаат витаминот Д подоцна во текот на денот, но
се поставува прашањето дали тоа влијае на сонот. Доказите за ова се поделени.
На пример, преглед на неколку студии од 2021 година сугерира дека витаминот Д
може да влијае на производството на мелатонин – хормонот кој го регулира
циклусот на спиење. Пониските нивоа на витамин Д пред спиење може да бидат
поврзани со зголемена конверзија на серотонин во мелатонин, што значи дека
земањето витамин Д непосредно пред спиење може да го намали нивото на мелатонин
и потенцијално да го наруши сонот.
Од
друга страна, понови истражувања, вклучувајќи преглед и анализа од 2024 година,
покажуваат дека суплементацијата со витамин Д всушност може да го подобри
квалитетот на сонот. Бидејќи витаминот Д може да делува различно кај различни
луѓе, најдобро е да експериментирате и да го најдете времето што вам најмногу
ви одговара.
Дали постои идеално време?
Иако
земањето витамин Д со оброк може значително да ја подобри неговата апсорпција и
поефикасно да го зголеми нивото во крвта, истражувањата сè уште не дале конечен
одговор на тоа дали е подобро да се зема наутро или навечер. Најважно е да го
вклопите витаминот Д во вашата секојдневна рутина и да го земате доследно за да
обезбедите максимална ефикасност.
Без
разлика дали го земате со појадок или со вечера, клучно е да го најдете времето
кое вам ви одговара и не ви го нарушува сонот. Доследноста е поважна од точниот
дел од денот. Суплементите се ефикасен начин да го подигнете нивото на витамин
Д, а ако ви е потребна помош при избор на доза или начин на земање,
задолжително консултирајте се со вашиот лекар или фармацевт.
Извор: vecer.mk
