Најголемата берза за криптовалути во светот Binance апелира до корисниците да внимаваат, откако се појави нов бран измами на WhatsApp, каде што измамници се претставуваат како официјални претставници на компанијата и бараат исплата на средства или нудат лажни инвестициски совети.
Оваа појава периодов најмногу е застапена во Франција и во Италија.
Од компанијата јасно порачуваат дека Binance никогаш не ги контактира своите корисници преку WhatsApp за да понуди инвестиции, да побара уплата или пак лични податоци.
„Овие лажни пораки претставуваат обид за измама и фалсификување на идентитет, а целта најчесто е фишинг напад, односно обид да се украдат лични податоци, лозинки, двофакторски кодови или крипто средства“, велат од компанијата.
Како Binance контактира со корисниците
Официјалната комуникација со Binance се одвива исклучиво преку проверени канали:
• Преку платформата Binance Customer Support (достапен 24/7),
• Преку официјалниот X (Twitter) профил: @binance,
• Преку Telegram, но само по верификација на контактот преку алатката Binance Verify,
• Преку е-пошта од верифицирани адреси.
Binance препорачува и внимателна проверка на сите групи каде што корисниците се членови, бидејќи измамниците често користат лажни крипто заедници за да стекнат доверба во луѓето, а потоа да ги измамат. Во водичот „Заштитете се од измами во онлајн заедници “ може да се прочитаат повеќе детали.
Како изгледа една WhatsApp измама
• Имитација: Измамникот креира профил кој изгледа како да е тој официјален претставник на Binance.
• Лажна итност: Измамниците често тврдат дека постои одреден проблем со сметката.
• Барање на податоци или уплата: Побарување лозинки, кодови или трансфер на крипто.
• Лажна доверба: Споделување реални податоци од јавни извори за измамата да изгледа убедливо.
• Изолација: Измамниците убедуваат да не комуницирате со Binance под изговор дека ситуацијата е „доверлива“.
По уплатата или споделувањето на информации, измамникот исчезнува, оставајќи ја жртвата со финансиска загуба.
Од Binance апелираат да не се верува на пораки преку WhatsApp од лица кои се претставуваат како официјални лица од компанијата, секогаш да се проверува автентичноста на контактите преку Binance Verify, да се користат само официјалните канали за комуникација и да не се споделуваат приватни податоци или кодови.
Binance повторува дека свесноста е најсилната одбрана против фишинг нападите. Со внимателност и проверка на изворите, корисниците можат да се заштитат себеси и пошироката крипто заедница.
„Заедно можеме да изградиме побезбедна крипто заедница и да ги заштитиме нашите средства,“ порачуваат од Binance.
