Дигиталната трансформација е главниот спојник меѓу растечката електрификација и целите за декарбонизација. Со паметни мрежи, управување засновано на податоци и киберотпорни платформи, енергетските системи стануваат поефикасни, пофлексибилни и поинклузивни, со помали загуби и подобра интеграција на обновливите извори. Ова беше основната порака од отворањето на панел-сесијата „Digital transformation of energy systems: accelerating action through coordination and innovation“, која се одржува во рамките на 14-тиот Меѓународен форум за енергија за одржлив развој – IFESD-14.
Министерот за дигитална трансформација Стефан Андоновски, кој со своето воведно обраќање го означи почетокот на сесијата, ја нагласи потребата од посилна координација меѓу енергетскиот и секторот на информатичко-комуникациски технологии (ИКТ).
„Дигитализацијата може да ја забрза нашата заедничка мисија за одржлива енергетска иднина. Таа е новата енергија на управувањето: создава ефикасност, транспарентност и отпорност, а во енергетиката овозможува секој ват, секој киловат-час и секоја политичка одлука да бидат попаметни, почисти и поинклузивни“, рече министерот Стефан Андоновски.
Андоновски ги посочи и приоритетите на Владата во дигиталната трансформација како хоризонтална реформа, со акцент на енергетиката и блиската соработка со Министерството за енергија, рударство и минерални ресурси, каде се воспоставени целосно дигитализиран систем за управување со документи, интегрирано финансиско планирање и достапна веб-страница, како и дигитализација на повеќе од 20 услуги за граѓани и бизниси.
Во воведниот дел на сесијата учествуваа и Радиа Седаоуи (ESCWA), Денис Мулхоланд (UNECE), Мајкл Вилијамсон (ESCAP) и Армен Григорјан (UNDP), кои ја поставија рамката на дискусијата: усогласени политики, управување со децентрализирано производство, пренос и складирање, интероперабилност со постојната инфраструктура и зајакнување на киберотпорноста.
Според целите и очекуваните исходи на организаторите, денешната програма има за цел да ги оцени бариерите и можностите за дигитализација, да идентификува пилот-иницијативи и партнерства и да ја засили координацијата и видливоста на засегнатите страни во согласност со приоритетите на UN-Energy за дигитализација. Сесијата е во коорганизација на Владата на Македонија, UNECE, ESCWA, ESCAP и UNDP. Додека организатор на форумот е Министерството за енергетика, рударство и минерални суровини во партнерство со УНДП и петте регионални комисии на Обединетите нации – UNECE, UNESCAP, UNECLAC, UNECA и UNESCWA.
